Wednesday, August 4, 2021

सत्ता समर्थक सांसद गायब, बजेट पास नहुने भएपछि सत्तापक्षबाटै संसद बहिस्कार

बुटवल– प्रदेशमा सांसद हराउने लहर नै चलेको छ । गत बैसाखमा गण्डकी प्रदेश सरकारका जनमोर्चा सांसद खिमबिक्रम शाही हराएकै शैलीमा लुम्बिनी प्रदेशका स्वतन्त्र सांसद अजय शाही सम्पर्कविहीन भएका छन्।

सांसद शाही बजेट पारित गर्ने दिनमा एकाएक सम्पर्कविहीन भएपछि सरकारलाई संकट पर्ने देखिएको छ। लुम्बिनी प्रदेश सरकारले ल्याएको आर्थिक वर्ष ०७८/७९ को बजेट पारित गर्न अहिले संसद् चलिरहेको छ।

मुख्यमन्त्री शंकर पोखरेलले संसदमा सम्बोधन गर्दै बजेट पास गराउन प्रतिपक्षको सहयोग मागे तर त्यो संभावना नदेखेपछि सत्तापक्षले नै संसद बहिस्कार गरेको छ । सभामुखले आधा घण्टाको लागि संसद स्थगित गरेका छन् ।

सरकारलाई समर्थन गर्ने ठानिएका शाही सूर्य चुनाव चिन्हबाट नवलपरासी (पश्चिम)–१ (ख) बाट निर्वाचित भएका थिए। उनी गत वैशाख १९ गते विपक्षी मोर्चामा सामेल भएको भनिएका शाहीले भोलिपल्टै एमाले नेतृत्वको सरकारलाई समर्थन रहेको विज्ञप्ति निकालेका थिए।

यसअघि एमाले नेतृत्वको सरकारमा राज्यमन्त्री भएकी सुमन शर्मा रायमाझीले राजीनामा दिएर विपक्षी गठबन्धनमा गएपछि सरकार अल्पमतमा परेको छ।

मुख्यमन्त्री शंकर पोखरेललाई समर्थन गरेका शाही एकाएक सम्पर्कविहीन भएपछि बजेट पारित गर्न सकस हुने देखिएको हो। शाही अस्पतालमा भर्ना भएको भन्दै सामाजिक सञ्जालमा फोटो सार्वजनिक भएको छ।


८३ सांसद रहेको यहाँ सरकारको बहुमतका लागि ४२ सांसद आवश्यक पर्छ। राज्यमन्त्रीको राजीनामापछि सरकारको पक्षमा ४१ मात्रै सांसद छन्। लुम्बिनी प्रदेशसभामा नेपाली कांग्रेसका १९, माओवादी केन्द्रका सभामुखसहित १९, जनता समाजवादी पार्टीका ३ जना र राष्ट्रिय जनमोर्चाका एक जना गरी ४२ जना सांसद सरकारको विपक्षमा छन्।

सांसद शाही सम्पर्कविहीन भएपछि सरकारको पक्षमा ४० जना मात्रै सांसद छन्। राज्यमन्त्रीबाट शर्माको बहिर्गमनसँगै सरकार अल्पमतमा परेको बेला अर्का सांसद समेत उपस्थित नभएकाले बजेट पारित गर्न सरकारलाई मत नपुग्ने विपक्षीहरुको भनाइ छ।

Leave a Reply

ताजा खबर

यो पनि पढौं